Projektbuxheti 2026 për Ministrinë e Shëndetësisë dhe Mbrojtjes Sociale parashikon rikonstruksionin e 100 Qendrave Shëndetësore në gjithë vendin.

Lajmin e bëri të ditur sot ministrja e Shëndetësisë dhe Mbrojtjes Sociale, Evis Sala e cila vizitoi Qendrën Shëndetësore në Maliq.

“Përmes projekt buxhetit 2026 me mbi 1 miliardë euro për shëndetësinë dhe mirëqenien sociale, mes të tjerash është planifikuar edhe rikonstruksioni i 100 Qendrave Shëndetësore në të gjithë vendin, në funksion të shërbimit për komunitetin”, tha Sala.

Sala solli shembullin e Qendrës Shëndetësore në Maliq, që sipas saj është model i kujdesit mjekësor modern dhe të integruar, ku së fundmi ofrohet edhe shërbimi i depistimit të shikimit për fëmijët.

“Në dy muajt e fundit, në të gjithë NJVKSH Korçë janë kryer 1000 depistime të shikimit për fëmijët, për të zbuluar dhe parandaluar herët problemet e syve”, informoi ministrja.