Në Ditën Ndërkombëtare të Trashëgimisë Audiovizive u nënshkrua marrëveshja e bashkëpunimit mes Arkivit Qendror Shtetëror të Filmit (AQSHF) dhe Radio Televizionit Shqiptar (RTSH), një hap i rëndësishëm për ruajtjen dhe promovimin e trashëgimisë filmike dhe mediatike.

Marrëveshja e firmosur nga Drejtoresha e Përgjithshme e RTSH-së, Eni Vasili dhe Drejtori i AQSHF-së, Eljan Tanini parashikon ndër të tjera vendosjen në dispozicion të filmave të restauruar nga AQSHF për pasurimin e arkivit të TVSH-së dhe shkëmbime të nevojave për digjitalizim të fondeve respektive.

Gjithashtu marrëveshja parashikon edhe pasurimin e fondit të AQSHF-së me materiale audiovizive të ngjarjeve më të rëndësishme historike dhe kulturore të xhiruara ndër vite nga RTSH.

Arkivi Qendror i Filmit vlerësoi se ky bashkëpunim shënon moment të rëndësishëm në misionin e përbashkët për ruajtjen, digjitalizimin dhe përcjelljen e trashëgimisë audiovizive shqiptare tek brezat e sotëm dhe të ardhshëm.

Kjo marrëveshje konsolidon përpjekjet për të siguruar që pasuria e paluajtshme kulturore e Shqipërisë, e regjistruar në kinematografi dhe televizion, të mbrohet në formatin më të sigurt digjital.

Burimi ATSH