Arkivi Qendror Shtetëror i Filmit do të ndërmarrë procesin e digjitalizimit të Fototekës së MHK-së, duke e kthyer atë në një pasuri digjitale sipas standardeve bashkëkohore.

AQSHF tha se, ky hap ndërmerret në vijim të misionit të përbashkët për ruajtjen e kujtesës vizuale dhe në kuadër të ristrukturimit dhe rikonceptimit të Muzeut Historik Kombëtar.

Projekti u zyrtarizua me nënshkrimin e marrëveshjes së bashkëpunimit nga drejtuesit Eljan Tanini, drejtor i Arkivit Qendror Shtetëror të Filmit dhe Elenita Roshi, drejtoreshë e Muzeut Historik Kombëtar.

AQSHF, si një institucion i specializuar tashmë për digjitalizimin foto-filmik, do të krijojë njësi digjitale dhe metadata për çdo element.

Që prej krijimit të tij në vitin 1981, Muzeu Historik Kombëtar ka grumbulluar një fond unik prej mbi 12 mijë fotonegativësh në fototekën e tij. Ky koleksion i çmuar dokumenton njerëz, ngjarje, objekte muzeore dhe aktivitete që pasqyrojnë historinë dhe trashëgiminë kombëtare.

Ky projekt është një hap i rëndësishëm drejt garantimit të qasjes, ruajtjes dhe promovimit të historisë për brezat e sotëm dhe ata që do të vijnë.

Burimi ATSH