Në kuadër të Skemës Kombëtare të Investimeve 2025, fermerët mund të përfitojnë mbështetje edhe për instalimin e sistemit të ujitjes me pika.

Lajmin e bëri të ditur sot ministrja e Bujqësisë dhe Zhvillimit Rural, Anila Denaj e cila ftoi fermerët të aplikojnë deri më 30 shtator në Skemën Kombëtare të Investimeve për 50% grant për instalimin e sistemit të ujitjes me pika.

Denaj theksoi se aplikimi është i vlefshëm për blloqe ekzistuese me pemë frutore, agrume, ullishte dhe vreshta, në sipërfaqe që variojnë nga 1 ha deri në 10 ha.

Ministrja u shpreh se mbështetja financiare arrin në 50% të vlerës totale të faturave tatimore, por jo më shumë se 250,000 lekë/ha.

“Përmes përfitimit të 50% grant nga skema dhe kombinimit me Kredinë e Butë me interes vetëm 2% dhe garanci sovrane prej 70% të kolateralit, siguroni financim të plotë për të gjithë investimin”, shtoi ministrja Denaj.

Burimi ATSH