Aeroporti Ndërkombëtar i Tiranës (TIA) njoftoi nisjen e dy linjave të reja ajrore drejt Francës, konkretisht në qytetet Nantë (Nantes) dhe Bordo (Bordeaux), të operuara nga kompania “Transavia France”.

Fluturimet drejt këtyre destinacioneve do të jenë aktive çdo të enjte dhe të diel, duke filluar nga ky muaj dhe do të zgjasin deri në shtator, si pjesë e një programi sezonal që synon të plotësojë kërkesën në rritje për udhëtime drejt Francës.

Ky zgjerim është pjesë e strategjisë së TIA-s për të forcuar prezencën në tregun francez dhe për të ofruar më shumë alternativa të drejtpërdrejta dhe të përshtatshme për udhëtarët.

“Nëpërmjet partneriteteve strategjike me linjat ajrore dhe investimeve të vazhdueshme, Aeroporti i Tiranës vazhdon të zgjerojë rrjetin e destinacioneve dhe të përmirësojë përvojën e udhëtimit për të gjithë pasagjerët”, theksohet në njoftimin zyrtar.