Administrata Doganore realizoi në masën 100% planin e të ardhurave për gjashtëmujorin e parë të vitit 2025, duke arritur të mbledhë 113.7 miliardë lekë.

Kjo shifër përfaqëson një rritje prej 3.3% krahasuar me të njëjtën periudhë të vitit të kaluar, duke reflektuar një performancë të qëndrueshme dhe efektive në administrimin dhe zbatimin e politikave fiskale.

Një nga faktorët kryesorë që ka ndikuar në këtë rritje është zgjerimi i volumit të mallrave të akcizës të zhdoganuara gjatë periudhës.

Sipas të dhënave të Drejtorisë së Përgjithshme të Doganave, janë zhdoganuar 44 mijë tonë karburant, 96 tonë cigare, 97 tonë kafe dhe 4,770 tonë birrë.

“Rezultatet e gjashtëmujorit të parë 2025 dëshmojnë se Administrata Doganore mbetet një shtyllë kyçe në sigurimin e të ardhurave buxhetore dhe në ruajtjen e stabilitetit fiskal të vendit. Përkundër sfidave makroekonomike, performanca e qëndrueshme, inovacioni në procedura dhe rekordet në zhdoganimin e mallrave të akcizës e vendosin institucionin në një trajektore pozitive edhe për gjashtëmujorin e dytë”, bën të ditur DPD.

Burimi ATSH