Presidenti i Republikës, Bajram Begaj shprehu sot shqetësim për tensionet në rritje mes Izraelit dhe Iranit.

Në konferencën e përbashkët për shtyp me presidenten e Maqedonisë së Veriut, Gordana Siljanovska – Davkova dhe presidentin e Bullgarisë, Rumen Radev në mbyllje të punimeve të Samitit të Procesit të Bashkëpunimit të Evropës Juglindore (SEECP) të mbajtur sot në Tiranë, në kuadër të kryesimit të këtij procesi nga Shqipëria, Begaj i bëri thirrje Iranit të ndalojë programet bërthamore dhe balistike dhe të përmbushë detyrimet e tij në përputhje me ligjin ndërkombëtar.

“Përparimet e bashkëpunimit rajonal janë të prekshme. Procesi i zgjerimit të BE-së nuk lidhet vetëm me integrimin ekonomik dhe reformat politike, por edhe me forcimin e sigurisë evropiane. Lufta në Ukrainë e ka treguar qartë se paqja, siguria dhe stabiliteti në Evropën Juglindore janë pjesë e arkitekturës më të gjerë evropiane të sigurisë”, tha Begaj.

“Shqipëria shpreh shqetësim për tensionet në rritje mes Izraelit dhe Iranit. Ky konflikt ka pasoja serioze për Lindjen e Mesme dhe më gjerë. Shqipëria riafirmon të drejtën e Izraelit për sigurinë dhe mbrojtjen e qytetarëve të vet. Po ashtu i bëjmë thirrje Iranit të ndalojë programet bërthamore dhe balistike dhe të përmbushë detyrimet e tij në përputhje me ligjin ndërkombëtar, përfshirë Traktatin për Mospërhapjen e Armëve Bërthamore”, theksoi Kreu i Shtetit.

“Shqipëria i bën thirrje të gjitha palëve për përmbajtje maksimale dhe për përpjekje diplomatike për të çtensionuar situatën dhe për të gjetur një zgjidhje të qëndrueshme”, nënvizoi Presidenti Begaj.

“Për Evropën Juglindore këto konflikte janë një paralajmërim dhe një kujtesë për brishtësinë e paqes dhe shpeshtësinë dhe shpejtësinë me të cilën mund të përhapet paqëndrueshmëria”, tha ai.