Ministri për Evropën dhe Punët e Jashtme, Igli Hasani ishte pjesë e delegacionit zyrtar nga Shqipëria që mori pjesë sot në ceremoninë mortore për papa Françeskun në Vatikan.

“Sot, në Vatikan, i japim lamtumirën Atit të Shenjtë, një udhëheqësi të paqes dhe një njeriu me dashuri dhe shërbim të jashtëzakonshëm për njerëzimin”, shkruan Ministri Hasani në një publikim në rrjete sociale ndërsa vlerëson gjithashtu figurën e papa Françeskut.

“Papa Françesku dëgjoi me zemër, qëndroi pranë më të brishtëve dhe udhëhoqi me shembull, gjithmonë duke zgjedhur forcën e butë të mëshirës dhe fuqinë e heshtur të përulësisë. Trashëgimia e Tij shpirtërore do të mbetet e gjallë në zemrat e miliona njerëzve për brezat që vijnë. Me lutje dhe mirënjohje nga Shqipëria, nderojmë kujtimin e Tij të paharruar”, shprehet ai.

Delegacioni shqiptar kryesohej nga Presidenti Bajram Begaj, ndërsa pjesë e tij ishin edhe ministrja e Shtetit për Administratën Publike dhe Antikorrupsionit, Adea Pirdeni dhe Ambasadorja e Republikës së Shqipërisë në Vatikan, Majlinda Frangaj.

Papa Françesku, i cili ndërroi jetë më 21 prill në moshën 88-vjeçare, do të varroset sot në bazilikën e Santa Maria Maggiore në Romë, në një ceremoni ku marrin pjesë liderë botërorë dhe anëtarë të familjeve mbretërore.

Qeveria shqiptare ka shpallur sot ditë zie kombëtare, në shenjë dhimbjeje, respekti e mirënjohjeje për Atin e Shenjtë, papa Françesku.