Zëvendëskryeministrja, njëherësh ministre e Infrastrukturës dhe Energjisë, Belinda Balluku, deklaroi se Parku fotovoltaik në Karavasta, është parku më i madh i energjisë diellore në Ballkanin Perëndimor.

E pranishme në ceremoninë e përurimit të këtij investimi, Balluku bëri të ditur se, investitori i këtij parku, kompania franceze “Voltalia” do të ndërtojë një park tjetër në Spitallë.

“Ky park mbart një sërë vlerash, është dhe parku më i madh fotovoltaik në Ballkan. Kemi arritur një çmim rekord. “Voltalia” për ne është një shembull i investimeve të huaja të suksesshme që zhvillohen në vendin tonë dhe në sektorin e energjetikës”, tha Balluku.

“Voltalia po ndërton një park të ri në Spitallë. Dua të nënvizoj edhe marrëdhëniet mes Shqipërisë dhe Francës ku ka marrëdhënie të shkëlqyera mes Macron dhe Ramës dhe vizita e tij në Shqipëri me një grup investitorësh ka krijuar një shembull të mirë për vendin tonë në BE”, u shpreh Balluku.

Ajo deklaroi se, Shqipëria aspiron brenda 2030 të jetë pjesë e BE, pasi siç tha ajo, na takon, se kemi lindur në zemër të Evropës dhe jemi një prej popujve më të lashtë dhe këtë nuk na e ndryshon dot askush”.

Burimi ATSH