Përfaqësuesja e Lartë për Politikën e Jashtme dhe Sigurisë së Bashkimit Evropian, Kaja Kallas reagoi sot lidhur me nënshkrimin e marrëveshjes së firmosur mes Bankës Europiane të Investimeve dhe qeverisë së Shqipërisë, për rindërtimin e hekurudhës Durrës-Rrogozhinë.

Në një postim në rrjetet sociale Kallas theksoi se kjo hekurudhë do të krijojë vende të reja pune dhe do të rrisë tregtinë.

“E gëzuar që isha dëshmitare e nënshkrimit të një marrëveshjeje mes Shqipërisë dhe Bankës Europiane të Investimeve, për të rindërtuar hekurudhën midis portit të Durrësit dhe Rrogozhinës. Kjo do të krijojë vende të reja pune, do të rrisë tregtinë dhe do të përmirësojë lidhjen, duke e sjellë Shqipërinë më afër fqinjëve të saj dhe BE-së”, shkruan Kallas.

Përfaqësuesja e Lartë për Politikën e Jashtme dhe Sigurisë së Bashkimit Europian, Kaja Kallas zhvilloi sot një vizitë zyrtare në Tiranë. Kallas u prit në një takim nga kryeministri Edi Rama dhe presidenti Bajram Begaj.

Kallas mori pjesë edhe në forumin e dialogut Shqipëri-BE për politikën e sigurinë dhe më pas në ceremoninë e marrëveshjes me Bankën Europiane të Investimeve.

Vizita zyrtare në Shqipëri erdhi si pjesë e turit ballkanik që përfshin takime në Mal të Zi dhe Bosnje Hercegovinë. Kjo ishte vizita e parë e Kallas që nga marrja e detyrës si Përfaqësuese e Lartë e Politikës së Jashtme të BE-së.

Burimi ATSH