Ministrja e Shtetit për Administratën Publike dhe Antikorrupsionin, Adea Pirdeni zhvilloi sot një takim në Berlin, me Sekretarin e Shtetit në Ministrinë Federale të Punëve të Brendshme dhe Komunitetit të Gjermanisë, Bernd Krösser.

Pirdeni bëri të ditur se temë e takimi ishin praktikat më të mira për të modernizuar më tej administratën tonë publike, dhe forcuar luftën kundër korrupsionit.

“Gjermania ka qenë përherë një nga mbështetësit kryesorë të reformave të rëndësishme të Shqipërisë, dhe rrugëtimit të vendit sa më të shpejtë në BE”, vlerësoi Pirdeni.

Më herët sot, ministrja Pirdeni zhvilloi një takim me përfaqësues të Fondacionit “Bertelsmann”, ku u diskutuan nga afër rezultatet e Shqipërisë në Indeksin e Transformimit Bertelsmann (BTI) për vitin 2024.

Indeksi konfirmon se Shqipëria është një vend me qeverisje të mirë, duke u renditur e 13-ta në botë nga 137 vendet në zhvillim dhe transformim të analizuara për indeksin e qeverisjes.

(ATSH)