Komisioneri për Mbrojtjen nga Diskriminimi ka ngritur shqetësimin mbi përmasat në rritje të dhunës ndaj grave në hapësirën digjitale.

Sipas Komisionerit për Mbrojtjen nga Diskriminimi teknologjia dhe rrjetet sociale po shfrytëzohen për të ushtruar forma të reja dhune, nga turpërimi i trupit dhe ngacmimi kibernetik, deri te shpërndarja pa leje e informacionit personal.

“Dhuna ndaj grave nuk është vetëm fizike, por po merr gjithnjë e më shumë një dimension dixhital: nga turpërimi i pjesëve të trupit dhe ngacmimi kibernetik (dërgimi i imazheve seksuale të pakërkuara në internet) te ndarja pa leje e informacionit personal në internet.

Për më tepër, format digjitale të dhunës gjinore ndaj grave janë veçanërisht të dukshme për gratë e ekspozuara ndaj formave të ndërthurura të diskriminimit, për shkak të faktorëve të tillë si PAK, orientimi seksual, feja, gjendja sociale, gjendja shëndetësore apo ekonomike”, thuhet në postimin në rrjetet sociale.

Komisioneri thekson se zhvillimi i shpejtë i teknologjive të informacionit dhe komunikimit po i ekspozon gratë dhe vajzat ndaj rreziqeve të reja, duke krijuar hapësira për abuzime që janë shpesh të vështira për t’u adresuar ligjërisht.

“Zhvillimi i shpejtë i teknologjive të informacionit dhe komunikimit sidomos rrjetet sociale lehtësojnë rrugë të reja për dhunën ndaj grave dhe vajzave, duke i ekspozuar ato ndaj rreziqeve më të mëdha të abuzimit” shkruhet në postimin e Komisionerit për Mbrojtjen nga Diskriminimi.