Ministri për Europën dhe Punët e Jashtme, Igli Hasani mori pjesë sot në takimin me “Miqtë e Ballkanit Perëndimor” të organizuar në Wachau, Austri, nga ministri për Europën dhe Punët e Jashtme të Austrisë, Alexander Schallenberg.

Hasani bëri të ditur se në takim u diskutua mbi përshpejtimin e integrimit dhe mbështetjen për 6 vendet e Ballkanit Perëndimor në Bashkimin Evropian.

Kryediplomati shqiptar theksoi se “angazhimi për integrimin në BE të Ballkanit Perëndimor duhet të vazhdojë”.

“Fokusi ynë duhet të mbeten prioritetet e tanishme me objektiv kryesor anëtarësimin e plotë të gjashtë vendeve të Ballkanit Perëndimor në BE. BE-ja do të jetë më e qëndrueshme, më e sigurt dhe më e plotë me përfshirjen e Ballkanit Perëndimor”, u shpreh Hasani.