Presidenti Bajram Begaj priti sot në një takim raportuesen për Shqipërinë në Parlamentin Evropian, Isabel Santos.

Zyra e shtypit pranë Presidencës bëri të ditur se biseda u fokusua në mbarëvajtjen e punimeve të parlamentit shqiptar, procesin e integrimit evropian të Shqipërisë, si dhe bashkëpunimin rajonal.

Presidenti Begaj theksoi së është shumë e rëndësishme të shikohet e kaluara, të vlerësohet e tashmja dhe të punohet për të ardhmen.

Gjatë bisedës, raportuesja për Shqipërinë në Parlamentin Evropian, Santos vlerësoi rolin e Presidentit të Republikës si faktor balancues në jetën politike të Shqipërisë.

Në takim u vlerësua kontributi i Shqipërisë dhe angazhimi pozitiv i vendit në politikën e jashtme, në çështjet e sigurisë si anëtare e NATO-s, si dhe në promovimin e paqes dhe përmirësimin e jetës së qytetarëve në rajon.

Gjithashtu, u theksua edhe nevoja për besueshmërinë e sistemit të drejtësisë, që do të nxiste pozitivisht investimet e huaja.