Besimtarët ortodoksë të Përmetit festojnë sot ditën e Shën Mërisë së Bënjës.

Ministrja e Turizmit dhe Mjedisit, Mirela Kumbaro uroi sot besimtarët me pamje nga Kisha e Shën Mërisë së Bënjës në Përmet, Monument Kulture i Kategorisë I, me vlera të veçanta historike.

“21 nëntori është ditë e shënuar për të gjithë përmetarët që vijnë në pelegrinazhin e përvitshëm, në një nga fshatrat më të bukur që do të jetë pa dyshim destinacioni i ardhshëm turistik, kur Qendra Historike të restaurohet siç u restaurua Kisha dhe siç u restaurua dhe u rijetësua Qendra Historike e Përmetit”, theksoi Kumbaro.

Në këtë ditë të shënuar përmetarët vijnë në pelegrinazhin e përvitshëm në një nga fshatrat më të bukur, destinacion turistik me potenciale kulturore dhe natyrore të mëdha.

Bënja është një vend me potenciale kulturore dhe natyrore të mëdha, e cila po kthehet në një ndër destinacionet turistike më të kërkuara në Përmet.

Kjo kishë ka planimetri drejtkëndore dhe tre nefe. Nga ana perëndimore është vendosur narteksi dhe nga ana lindore absida. Hyrjet nga perëndimi dhe jugu mbulohen me portik të mbështetur mbi kolona. Nga analizat nuk paraqitet prezenca e pikturave murale.

Në vitin 1967 u mbyll nga regjimi komunist dhe u rihap në korrik 1991. Në 2018-ën ajo iu nënshtrua procesit të rijetësimit. Hyrja për në kishë bëhet nga ana perëndimore nëpërmjet një harkade të përbërë nga dy kolona guri. Kjo kishë është e rrethuar nga qiparisa dhe me pamje mbi luginë.

Në datë 21 nëntor, kjo kishë pret pelegrinët e luginës, që festojnë ditën e ‘Shën Mërisë së Bënjës’.

(Marrë nga ATSH)