Më 25 gusht 1908, u lind Ihsan bej Toptani, një nga figurat më enigmatike të Luftës së Dytë Botërore.

Rridhte nga një familje atdhetarësh. Qe biri i Abdi bej Toptanit, veprimtar i çështjes kombëtare. U shkollua në Austri, ku në vitin 1940 mori edhe gradën “doktor”.

Në atdhe do të kthehej më 1942-shin dhe do të përfshihej ngushtimisht me luftën, duke u bërë bashkëlidhës i politikave britanike me palët ndërluftuese, siç ishin forcat balliste, zogiste dhe ato të Nacional-Çlirimtares.

Toptani është një nga organizuesit kryesorë të Mbledhjes së Mukjes, takimi i parë i të cilës u mbajt pikërisht në shtëpinë e Toptanajve në Tapizë.

I gjendur para ngjarjeve të fundluftës, Toptani detyrohet të mërgojë bashkë me Abaz Kupin drejt Italisë.

Vitet e mëpasme do të zhvendosej nga Roma në Maltë, në Athinë dhe vite më pas në Angli. Në vitin 1958 bëhet nënshtetas britanik dhe pjesëtar i seksionit shqip të BBC-së. Toptani ndërroi jetë më 28 maj 2001, në moshën 93-vjeçare.