Sigurimi i banesave dhe njësive të biznesit nga tërmeti do të jetë i detyrueshëm. Ministria e Financave ka hedhur për konsultim publik ligjin që detyron çdo pronar të një banese që të paguajë primin vjetor të sigurimit në rast të një goditje sizmike.

Duke qenë se vendi ynë ka aktivitet të lartë sizmik dhe goditja më e fundit e 2019 shkaktoi dëme të mëdha materiale në 6 bashki, dëme që u mbuluan nga buxheti i shtetit dhe donatorët është menduar që sigurimi i banesave të bëhet i detyruar për rastet e tërmetit.

Shqipëria renditet e para në Europë dhe e 61 në rang botëror në indeksin e rrezikut të fatkeqësive bazuar në kapacitete përballuese.

Në relacionin që shoqëron projektligjin arsyetohet se qëllimi i këtij ligji është mbulimi i humbjeve financiare të pësuara nga i siguruari për shkak të dëmeve të drejtpërdrejta të ndodhura në pasurinë e siguruar, të shkaktuara nga ngjarjet e tërmetit për banesa; seksionet që ndodhen brenda banesave e që përdoren si njësi shitje, zyra apo për qëllime të ngjashme.

Detyrimin për blerjen e policës së sigurimit nga tërmetet e kanë edhe subjektet e banesave sociale me qira, përfshirë banesat në proces legalizimi, si edhe njësitë e vetqeverisjes vendore, të cilët financojnë primin nga buxheti i tyre. Për shtresat në nevojë në ligj parashikohet që të jetë buxheti i shtetit ai që financon primin e sigurimit të detyrueshëm nga tërmetet.

Tv Klan