Kryeministri Edi Rama reagoi sot sërish në lidhje me rrëmbimin e tre policëve të Kosovës, duke vënë në dukje se KFOR-i nuk do të dalë me konkluzione publike për vendndodhjen e tre policëve të Kosovës.

Rama renditi disa pika që përmbledhin qëndrimin e tij dhe të qeverisë sa i takon situatës në Kosovë, duke u ndalur së pari tek rrëmbimi i policëve.

“Pavarësisht pretendimeve të ndryshme për vendndodhjen, ata duhet të kthehen sa më parë në shtëpi. Qysh dje ne jemi 100 % të fokusuar tek lirimi i tyre”, theksoi Rama.

“Nuk ka asnjë paralele mes tre policëve dhe personit me precedentë kriminalë të arrestuar nga policia e Kosovës në Veri”, vijoi ai.

“De-eskalimi mbetet prioriteti i prioriteteve dhe pikat e vendosura nga bashkësia euroatlantike duhen përmbushur një orë e më parë”, tha Rama.

Policia e Kosovës informoi dje se tre zyrtarë kufitarë janë rrëmbyer nga forcat serbe gjatë një patrullimi në vijën kufitare në veri të Kosovës. Policia ka bërë të ditur se njësia policore ka qenë duke patrulluar thellë brenda territorit të Kosovës për të parandaluar shfrytëzimin e rrugëve ilegale.