Zëvendëskryeministrja, njëherësh ministrja e Infrastrukturës dhe Energjisë, Belinda Balluku zhvilloi një takim në Shkup me Zëvendëskryeministrin, Fatmir Bytyçi dhe Zëvendëskryeministërin e parë, Artan Grubi.

Në një postim në rrjetet sociale Balluku ndau momente nga takimi me Bytyçin dhe Grubin.

“Me homologët Bytyçi dhe Grubi diskutova përkatësisht për projektet energjetike që kemi të përbashkëta me Maqedoninë e Veriut dhe për rëndësinë dhe ecurinë e Kooridorit të VIII duke përfshirë këtu autostradën që ka nisur nga të dya krahët, por edhe projektet e hekurudhës”, tha Balluku.

Balluku mori pjesë sot në Shkup në takimin dy ditorë të vendeve të Ballkanit Perëndimor, ku po diskutohet mbi sfidat që ka rajoni për sigurinë energjetike.

Balluku dhe Bytyçi në një prononcim për mediet theksuan nevojën e bashkëpunimit rajonal.

“Maqedonia e Veriut dhe Shqipëria kanë nisur prej kohësh të bashkëpunojnë, sidomos për sa i përket projektit të ri të portit të Vlorës, ku parashikohet një gazifikim i lundrueshëm”, tha Balluku.