Qendra Kombëtare e Transfuzionit të Gjakut prezanton aplikacionin “UnëDhuroj” dedikuar dhuruesve të gjakut, një platformë informuese që ofron të dhëna të plota mbi pikat e dhurimit, grupet e gjakut dhe analizat e nevojshme, duke mbështetur rritjen e dhurimit vullnetar në vend.

Dr. Viola Shano nga Qendra Kombëtare e Transfuzionit të Gjakut bëri të ditur se aplikacioni ri vjen në ndihmë për të gjithë dhuruesit e gjakut për të marrë një informacion për sa i përket të gjitha pikave ku mund të dhurohet gjak në të gjithë Shqipërinë.

Gjithashtu, Shano tha se ky aplikacion ofron informacione bazë në lidhje me dhurimet e gjakut me grupet apo me nevojat që mund të ketë një i afërm i tyre.

“Ky aplikacion që do të prezantohet sot ka të bëjë me një risi për sa i përket analizave të dhuruesve të gjakut, ku ne në bazë të të dhënave që do të kemi nga databaza, do të bëjmë një vlerësim metabolik dhe kardiovaskular, ku përgjigjet e tyre do t’i dërgohen me email secilit dhurues, në mënyrë që të kemi një parandalim për këto risqe që mund të paraqiten”, tha Shano.

Sipas saj, aplikacioni vjen në kuadër të projektit “Ripresa” në bashkëpunim me organizatën e dhuruesve vullnetar të gjakut.

/Marrë nga ATSH