Korporata Elektroenergjetike Shqiptare (KESH) bën të ditur se sot, situata aktuale në kaskadën e lumit Drin është nën kontroll, sipas përditësimit të të dhënave për prurjet e ujit në lumin Drin në kushtet e motit me reshje intensive.

Sipas të dhënave të KESH-it, prurjet natyrore në kaskadën e Drinit janë regjistruar në nivelin 1 500 metra kub në sekondë në HEC Fierzë, 500 metra kub në sekondë në HEC Koman dhe 60 metra kub në sekondë në HEC Vau i Dejës.

Nivelet e liqeneve të kaskadës së Drinit janë përkatësisht 289.8 metra mbi nivelin e detit në HEC Fierzë, 173.3 metra mbi nivelin e detit në HEC Koman dhe 74.9 metra mbi nivelin e detit në HEC Vau i Dejës.

Prodhimi ditor i energjisë elektrike në tre hidrocentralet e kaskadës ka arritur në 16 300 megavat-orë. Sa i përket shkarkimeve, në HEC Fierzë nuk ka shkarkime, ndërsa në HEC Koman dhe HEC Vau i Dejës shkarkimet janë në nivelin 700 metra kub në sekondë secili.

Korporata Elektroenergjetike Shqiptare thekson se do të vijojë monitorimin e situatës dhe informimin transparent të opinionit publik dhe të autoriteteve përgjegjëse.

Burimi ATSH