Segmenti i përpunimit të mallrave me kontejnerë në Portin e Durrësit ka shënuar një performancë pozitive gjatë periudhës janar-tetor 2025, me 189.835 kontejnerë të trajtuar, ose 15% më shumë se një vit më parë.

Autoriteti Portual Durrës bëri të ditur sot se kjo rritje shoqërohet edhe me një dinamikë më të fortë tregtare, ku importet janë rritur me 14%, ndërsa eksportet janë ato që dominojnë me 16%, duke reflektuar një rritje progresive më të qëndrueshme në transportin ndërkombëtar të mallrave me kontejnerë.

Në total janë përpunuar 1.745.776 tonë mallra, duke regjistruar një rritje prej 2% krahasuar me të njëjtën periudhë të vitit që lamë pas, duke e renditur kështu Portin e Durrësit në një ndër nyjet më të konsoliduara logjistike në rajon.

Durrësi vijon të mbetet nyja më e rëndësishme detare dhe logjistike e Shqipërisë, duke përmbushur me eficiencë kërkesat e tregut, duke siguruar standarde të larta operimi dhe duke ndjekur një tendencë të vazhdueshme rritjeje që konfirmon rolin e tij strategjik në zhvillimin ekonomik të vendit dhe në integrimin me rrjetet rajonale e ndërkombëtare të transportit.

Burimi ATSH