Zëvendësministri i Financave, Andi Memeti, mori pjesë në Global Banking Market Forum 2024, i cili u zhvillua në Stamboll dhe mblodhi përfaqësues të sektorit financiar, institucione ndërkombëtare dhe investitorë globalë.

Gjatë panelit të dedikuar perspektivës së zhvillimit të Shqipërisë, Memeti theksoi se vendi po ecën me vendosmëri drejt vendosjes së një balance të qëndrueshme midis stabilitetit fiskal dhe tërheqjes së investimeve të qëndrueshme, si rezultat i reformave të ndërmarra nga qeveria.

Memeti u shpreh se politikat fiskale të kujdesshme po krijojnë një klimë të favorshme për sipërmarrjen, ndërsa reformat strukturore po nxisin rritjen e konkurrueshmërisë së ekonomisë.

Zëvendësministri i Financave vuri në dukje se Shqipëria është e angazhuar të avancojë me hapa të sigurt drejt integrimit në tregjet më të mëdha të kapitalit të Europës Qendrore, Lindore dhe Azisë Qendrore, me synimin për ta pozicionuar vendin si një destinacion të hapur, të qëndrueshëm dhe tërheqës për investitorët ndërkombëtarë.

Burimi ATSH