Organizata e Kombeve të Bashkuara UN Women e cilësoi ligjin e ri për Barazinë Gjinore në Shqipëri një hap të rëndësishëm drejt sigurimit të mundësive të barabarta për të gjithë, gra e burra, vajza e djem.

Në një postim në rrjetet sociale, UN Women theksoi se ligji garanton barazi në punësim, arsim, shëndetësi dhe mbrojtje sociale, duke promovuar pjesëmarrje të barabartë dhe mbrojtje institucionale nga diskriminimi me bazë gjinore.

“Ky nuk është thjesht një ligj për gratë, ai është një fitore për familjen dhe shoqërinë në tërësi, duke u dhënë vajzave dhe djemve tanë mundësinë të rriten në një vend që vlerëson çdo njeri në mënyrë të barabartë”, thuhet në postimin e UN Women.

Kuvendi miratoi dje me 77 vota pro dhe 36 kundër projektligjin për barazinë gjinore. Projektligji është pjesë e detyrimeve që Shqipëria ka ndaj Bashkimit Evropian dhe përmirëson kuadrin ligjor të vitit 2008 për barazinë gjinore.