Drejtori i përgjithshëm i Doganave Shqiptare, Genti Gazheli, zhvilloi një takim zyrtar me Matthias Petschke, drejtor në Komisionin Evropian (DG TAXUD), dhe stafin e tij, në Bruksel.

Gazheli tha se, gjatë takimit diskutimet u fokusuan në zbatimin e udhërrëfyesit të Kapitullit 29 – Bashkimi Doganor, në kuadër të procesit të aderimit të Shqipërisë në BE.

Gazheli shprehu angazhimin maksimal të qeverisë për përmbushjen e standardeve të BE-së në sektorin doganor.

Ai ritheksoi përkushtimin e institucioneve shqiptare për: Përafrimin e plotë të legjislacionit doganor me acquis-in e BE-së; Forcimin e kapaciteteve administrative dhe profesionale në sistemin doganor; Modernizimin e sistemeve digjitale, për të mundësuar ndërveprim të plotë me sistemet evropiane si ICS2, UCC, etj., si dhe rritjen e transparencës në luftën kundër informalitetit dhe kontrabandës.

DG TAXUD vlerësoi përpjekjet dhe progresin e deritanishëm të administratës doganore shqiptare, si një sinjal pozitiv për përparimin e mëtejshëm në rrugën e integrimit evropian.

“Administrata Doganore Shqiptare po ecën me hapa të qartë drejt përmbushjes së standardeve evropiane. Përkushtimi institucional dhe investimi në modernizim janë shenja pozitive për rrugën integruese të Shqipërisë”, theksuan ata.

Burimi ATSH