Drejtori i Përgjithshëm i Agjencisë Kombëtare të Mbrojtjes Civile, Haki Çako tha sot se situata e zjarreve po shkon drejt normalizimit, ndërsa janë angazhuar rreth 10 mijë forca për shuarjen e zjarreve në të gjithë vendin.

Në një prononcim për mediet, Çako tha se “që prej datës 15 qershor, jemi në krye të detyrës për t’u ardhur në ndihmë qytetarëve”.

“I gjithë sistemi i mbrojtjes civile është në këmbë dhe në gatishmëri të jashtëzakonshme. si Mbrojtja nga Zjarri dhe Shpëtimi, Policia e Shtetit, Forcat e Armatosura, Urgjenca Mjekësore, por mbi të gjitha edhe angazhimi i vullnetarëve ka qenë i madh dhe i konsiderueshëm”, u shpreh ai.

Sa i takon të dyshuarve dhe arrestuarve për zjarrvënie, Çako tha se “jemi në proces të vazhdueshëm dhe intensiv për të marrë në konsideratë edhe sanksione më të ashpërsuara në adresë të personave që me papërgjegjshmëri apo me dashje kriminale apo me tendenca të caktuara vunë zjarre dhe për pasojë zjarret marrin përmasa të jashtëzakonshme dhe krijojnë pasoja qoftë në jetën e njerëzve ne ekonomi, mjedis etj”.

Më tej, Çako tha se “këto i përkasin fazës tjetër dhe do të duhet që të gjitha institucionet të marrin masat e veta dhe sanksionet ndaj këtyre personave”.

Çako u shpreh se “situata po shkon drejt normalizimit”.

“Përmasat e zjarreve të këtij viti janë të pakrahasueshme me vitet e tjera. Kjo është e lidhur me shumë faktorë edhe me faktorë të tjerë që kanë të bëjnë me ngrohjen globale apo edhe me elementë që janë në shqyrtim nga institucionet dhe strukturat ndërkombëtare që merren me riskun në nivel global dhe mund të themi që Mesdheu ku përfshihet edhe Shqipëria ka filluar të jetë një zonë shumë e nxehtë në pyje dhe kullota”, theksoi Çako.

Kreu i AKMC-së tha se “duhet filluar të ndryshojnë strategjitë dhe të fillojmë të përgatitemi më mirë në aspektin e teknologjisë dhe përballjes sepse në shumicën e rasteve mjetet dhe teknika është urbane dhe jo rurale apo më saktë për të mbrojtur këto zona që kërkojnë më shumë investim”.

Burimi ATSH