Nisma qeveritare “Paketa e Maleve”, e prezantuar pak kohë më parë me synimin për të nxitur zhvillimin ekonomik dhe investimet në zonat malore të Shqipërisë, ka marrë një jehonë të gjerë në të gjithë vendin.
Sipas të dhënave të publikuara nga Agjencia për Median dhe Informacionin (MIA), deri më tani, janë regjistruar 3308 aplikime, duke treguar një interes të lartë nga qytetarët, fermerët dhe sipërmarrësit për të përfituar nga lehtësitë që ofron kjo paketë.
Referuar të dhënave Shkodra shënon numrin më të lartë me 687 aplikimeve.
MIA bën të ditur se, aplikimet sipas qarkut janë: Berati 162; Dibra 323; Durrësi 96; Elbasani 348; Fieri 113; Gjirokastra 185; Korça 244; Kukësi 324; Lezha 147; Shkodra 687; Tirana 301; Vlora 378.
Aplikimet për këtë nismë do të vijojnë përgjatë gjithë vitit për qytetarët dhe emigrantët që duan të investojnë në Shqipëri.
Kjo nismë synon të krijojë kushte më të favorshme për zhvillimin e turizmit, agropërpunimit, bujqësisë dhe blegtorisë në zonat me potencial të lartë natyror, por me akses të kufizuar në investime.
Aplikimet mbeten të hapura deri në fund të vitit 2025, ndërsa 500 aplikantët e parë do të përfitojnë lehtësira fiskale për një periudhë 10-vjeçare, një masë që synon të nxisë investimin e hershëm dhe të qëndrueshëm në këto zona.
“Paketa e Maleve” vjen si pjesë e një strategjie më të gjerë për zhvillimin e zonave të thella malore dhe për frenimin e braktisjes së territorit, duke e kthyer potencialin natyror në një burim të qëndrueshëm të ardhurash për komunitetet vendase.
