Instituti Parlamentar dhe Sekretariati Teknik i Këshillit Kombëtar të Integrimit Evropian (KKIE) zhvilluan sot një takim ndërgjegjësues me studentët e Fakultetit të Histori-Filologjisë të Universitetit të Tiranës, mbi rolin që luan Kuvendi i Shqipërisë në procesin e integrimit evropian.

Studentët u mirëpritën në ambientet e Kryesisë së Kuvendit nga Lidra Bushati, Drejtoreshë e Bibliotekës së Kuvendit, Julia Çela, Drejtoreshë e Përgjithshme e Shërbimit të Integrimit, dhe Elda Zenelaj, Drejtore e Sekretariatit Teknik të KKIE-së.

Gjatë takimit u diskutuan çështje kyçe që lidhen me funksionin e Kuvendit në procesin e integrimit në Bashkimin Evropian, përfshirë hapat e ndërmarra në përafrimin e legjislacionit kombëtar me atë të BE-së, ndryshimet ligjore që forcojnë rolin mbikëqyrës të Kuvendit, si dhe bashkëpunimin me institucionet evropiane dhe parlamentet e vendeve anëtare.

Një tjetër pikë e rëndësishme e diskutimit ishte edhe puna e Këshillit Kombëtar të Integrimit Evropian, sfidat që shoqërojnë procesin e negociatave dhe rëndësia e ndërgjegjësimit publik për reformat integruese.

Në sesionin e pyetjeve dhe përgjigjeve, studentët shfaqën interes mbi sfidat praktike të përafrimit të legjislacionit, ndikimin e euroskepticizmit në opinionin publik, përfitimet nga anëtarësimi në BE, si dhe mënyrat e përfshirjes së të rinjve në procesin integrues.

Takimi u mbyll me një tur informues në ambientet e Kryesisë së Kuvendit, ku studentët u njohën më nga afër me funksionimin e institucionit ligjvënës.

Burimi ATSH