Ministrja e Turizmit dhe Mjedisit, Mirela Kumbaro mori pjesë sot në një takim tek “InNature”, klubi mikpritës i Agjencisë Kombëtare të Zonave të Mbrojtura.

Në qendër të takimit, ku merrnin pjesë miq të natyrës, ishte zhvillimi i ekoturizmit në Shqipëri.

“Zonat e Mbrojtura që janë perlat e natyrës sonë, mund t’i njohim më mirë falë një armate prej më shumë se 800 udhërrëfyesish turistikë, por tani edhe falë platformës digjital www.albaniantrails.al, fryt i një bashkëpunimi të qëndrueshëm mes Agjencisë Kombëtare të Zonave të Mbrojtura dhe partnerëve të GIZ Albania, të cilët do të vazhdojnë të çojnë përpara projekte të reja për zonat e mbrojtura”, tha Kumbaro.

Ministrja Kumbaro u shpreh se “në këto katër muaj të vitit 2025, parqet tona kombëtare dhe natyrore janë vizituar nga 867 mijë vizitorë, ose 60 mijë më shumë se një vit më parë”.

Zonat e Mbrojtura janë oaz i biodiversitetit në Shqipëri, tanimë me një sipërfaqe të shtuar, duke zënë 21,5% të territorit të vendit

Zgjerimi i Zonave të Mbrojtura në Shqipëri synon të rrisë integritetin e këtyre zonave, për gjendjen e paprekur të tyre, krahasuar me zona të tjera të vendit, për biodiversitetin e lartë dhe për habitatet e rralla që bartin.

Zonat e Mbrojtura në vend janë kthyer gjithashtu në destinacione turistike mjaft të vizituara për shkak të bukurive natyrore dhe relievit të larmishëm.