Kryeministri Edi Rama e ka cilësuar si turpërues vendimin e Gjykatës Speciale në Kosovë për të mos lejuar ish-presidentin Hashim Thaçi, i cili ndodhet në burg në Hagë, për të mos marrë pjesë në ceremoninë e varrimit të babait të tij.

Nëpërmjet një postimi në rrjetet sociale Rama shkruan se një gjykatë turpëruese e ka kthyer drejtësinë ndërkombëtare në një farsë.

“Një ulje e re nga një gjykatë turpëruese dhe e paturpshme, e cila e ka kthyer drejtësinë ndërkombëtare në një farsë, të drejtat demokratike në fjalë boshe, dhe vullnetin e Parlamentit të Kosovës në një boomerang të dhunshëm!”, shkruan Rama në një postim në rrjetet sociale.

Haxhi Thaçi, babai i ish-presidentit të Kosovës Hashim Thaçi u nda nga jeta një ditë më parë (16 mars). Thaçi ishte i shtruar në Qendrën Klinike Universitare pasi ishte në gjendje të rëndë shëndetësore.

Më 13 mars ai u vizitua nga Hashim Thaçi, i cili mori leje nga Haga, ku ndodhet i arrestuar. Pas vizitës prej rreth tre orësh, ai u rikthye sërish në Hagë.

Që nga nëntori i vitit 2020, ish-Presidenti i Kosovës, Hashim Thaçi gjendet në paraburgim në Hagë, pasi ndaj tij rëndojnë akuzat për krime lufte dhe krime kundër njerëzimit.