Ministri i Mbrojtjes, Pirro Vengu u shpreh se me hyrjen në fuqi të ligjit për Forcën Rezerviste, sot ka një instrument shtesë dhe shumë të rëndësishëm për të rritur efikasitetin e Forcave të Armatosura dhe Mbrojtjes Civile.

Ai theksoi se me këtë ligj rikthehet komponenti i rezervistëve në FA.

“Numri i rezervistëve do të jetë sa 20% e forcave aktive, ndërsa rezervistët do të shërbejnë nga 14 deri në 45 ditë në vit”, bëri të ditur Vengu në një postim në rrjetet sociale.

Vengu gjithashtu u shpreh se ky ligj mundëson trajtim financiar dinjitoz për rezervistët, 4.600 lekë/ditë për ushtarak.

“Mbi 15.5 milionë euro alokohen për aktivizimin fillestar të këtij komponenti ndërsa 8.5 milionë euro do të përdoren për 40 ditë mobilizim në vit”, bëri të ditur ministri Vengu.

Burimi ATSH