Biblioteka Kombëtare e Shqipërisë përkujtoi përmes një ekspozite akademikun Stefanaq Pollo, në 100-vjetorin e tij të lindjes. Kontributi i tij shkencor në fushën e studimeve historike është përmbledhur në këtë ekspozitë duke sjellë në vëmendje botimet të shumta shkencore, si dhe artikujt studimorë në revistat shkencore, brenda dhe jashtë vendit.

Historian, profesor, akademik, personalitet i historiografisë shqiptare. Ai lindi në Përmet dhe kreu Liceun Kombëtar (francez) të Korçës. Studimet e larta për histori i kreu në Universitetin “Lomonosov” të Moskës (1945-1950).

Mori pjesë në Luftën Antifashiste Nacionalçlirimtare. Gjatë viteve 1944-1945 punoi si kryeredaktor i gazetave “Kushtrimi i Lirisë” e “Rinia” dhe i gazetës “Bashkimi”.

Në vitet 1950-1951 ka qenë pedagog i historisë në Institutin Pedagogjik Dyvjeçar, më 1951-1957 nënkryetar i Institutit të Shkencave, gjatë viteve 1957-1958 dhe 1968-1969 dekan i Fakultetit të Historisë e të Filologjisë dhe më 1972-1989 drejtor i Institutit të Historisë të ASHSH-së.

Me krijimtarinë e tij shkencore ka hedhur themelet e studimeve shqiptare për epokën e Rilindjes Kombëtare, por veç kësaj ka rrokur edhe një gamë të gjerë problemesh të historiografisë shqiptare.

Vepra e tij shkencore, e përmbledhur në dy vëllime “Në gjurmë të historisë shqiptare” (1990, 2003), hedh dritë mbi probleme si: formimi i kombit dhe i lëvizjes kombëtare shqiptare, roli i popullit shqiptar në historinë e re dhe të sotme në rrafshin ballkanik dhe europian, Lidhja Shqiptare e Prizrenit, Shpallja e Pavarësisë së Shqipërisë, roli dhe vendi i feve në Shqipëri gjatë Rilindjes, që përbën një monografi të mirëfilltë etj.

Akademiku Stefanaq Pollo ka kontribuuar si bashkautor dhe redaktor përgjegjës në hartimin e veprave të tilla madhore të historiografisë shqiptare, si: “Historia e Shqipërisë” (1959 dhe 1965); “Historia e Shqipërisë” (1983 dhe 1984). Ai gjithashtu ka qenë bashkautor i “Historisë së popullit shqiptar” (2002), bashkautor dhe redaktor përgjegjës i veprës “Historia e Shqipërisë nga origjina në ditët tona”, botuar në frëngjisht (Lion, 1974) dhe anglisht (Londër, 1981), si dhe bashkëpërgatitës i “Akte të Rilindjes Kombëtare Shqiptare 1878-1912” (1978).

Një vend të veçantë zë edhe kontributi i tij si redaktor dhe bashkëpërgatitës i disa botimeve dokumentare dhe përmbledhjeve me artikuj e kumtesa, si: “Konferenca e Parë e Studimeve Albanologjike” (1965), “Konferenca e Dytë e Studimeve Albanologjike” (në tre vëllime, 1969), “Alfabeti i gjuhës shqipe dhe Kongresi i Manastirit” (1972), “Konferenca kombëtare e studimeve etnografike” (1977) etj. Ka qenë kryeredaktor i revistës “Studime historike” (1964-1990), anëtar i Komitetit Ballkanik të AIESEE-së.

Akademiku Stefanaq Pollo ka marrë Çmimin e Republikës të shkallës së parë dhe është dekoruar me Urdhrin “Flamuri i Kuq i Punës” të kl. I.

Ekspozita do të qëndrojë e hapur për publikun në Sallën Shkencore në BKSH.