Ministrja e Bujqësisë dhe Zhvillimit Rural, Anila Denaj u takua me drejtorin e përgjithshëm të Organizatës së Kombeve të Bashkuara për Zhvillimin Industrial (UNIDO), Gerd Muller.

Takimi u mbajt në kuadër të punimeve të konferencës ndërkombëtare të organizuar nga UNIDO në Vjenë, mbi industrializimin në vendet me të ardhura të mesme.

“Diskutuam së bashku për ekspertizën që mund të ofrojë UNIDO për strategjinë e zhvillimit industrial të Shqipërisë, veçanërisht për sektorët prioritarë si agrobiznesi dhe mbështetja e rrugës drejt integrimit në BE”, u shpreh Denaj.

Takimi ministror i “Grupit me mendje të njëjtë për vendet me të ardhura të mesme” u mbajt në kuadër të sesionit të 78-të të Asamblesë së Përgjithshme të Kombeve të Bashkuara.

Aktualisht i përbërë nga 108 vende, MIC-të janë një grup i larmishëm që përbën 30 % të prodhimit të brendshëm bruto global (PBB) dhe 75 % të popullsisë së botës.