Gjykata e Apelit Kundër Krimit të Organizuar dhe Korrupsionit rrëzoi kërkesën e ish-kryebashkiakut të Durrësit, Vangjush Dako për zbutje të masës së sigurisë.

I akuzuar për “shpërdorim detyre” në dy raste, Dako do të vazhdojë të qëndrojë në qeli deri në përfundim të hetimit. Apeli i GJKKO mori në shqyrtim të martën kërkesën e Dakos dhe të pandehurve të tjerë për zbutje të masës së sigurisë. Por togat e zeza, pasi shqyrtuan argumentet, vendosën të lënë në fuqi vendimin e Shkallës së Parë, pra lënien në qeli të ish-kryebashkiakut.

GJKKO e apelit vendosi lënien në burg dhe për të pandehurit e tjerë, Fiqiri Farrukun që është ndërtuesi i pallatit, si dhe Fatmir Ejupi, Meri Semini (Priftuli), Ferzilet Hajderi, dhe Adrian Bulku.

Vangjush Dako, ish kryebashkiaku i Durrësit, u arrestua më 6 qershor 2023. SPAK e akuzon Dakon për “shpërdorim të detyrës” në 2 raste.

“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Daniela Shirka, sot më 18.07.2023, zhvilloi seancë gjyqësore për çështjen penale nr. 31 akti, datë 10.07.2023 regjistrimi, regjistruar mbi ankimet e personave nën hetim V.D., F.E., M.S.(P.), F.H., F.F., A.B., ndaj vendimeve nr. 57, datë 06.06.2023 dhe nr. 61, datë 08.06.2023 të Gjykatës së Posaçme të Shkallës së Parë për Korrupsionin dhe Krimin e Organizuar, dhe vendosi: Miratimin e vendimit nr. 57 akti, datë 06.06.2023 dhe vendimit nr. 61 akti, datë 08.06.2023 të Gjykatës së Posaçme të Shkallës së Parë për Korrupsionin dhe Krimin e Organizuar për personin nën hetim V.D.

Miratimin e vendimit nr. 57 akti, datë 06.06.2023 të Gjykatës së Posaçme të Shkallës së Parë për Korrupsionin dhe Krimin e Organizuar për personat nën hetim F.E. dhe F.H. Miratimin e vendimit nr. 61 akti, datë 08.06.2023 të Gjykatës së Posaçme të Shkallës së Parë për Korrupsionin dhe Krimin e Organizuar për personat nën hetim M.S.(P.), F.F. dhe A.B.”, përfundon njoftimi.