Një delegacion i Kuvendit të Shqipërisë, i kryesuar nga Sekretari i Përgjithshëm, Genci Gjonçaj, dhe drejtues të shërbimeve të Kuvendit, po zhvillojnë një vizitë pune në parlamentin e Portugalisë, me mbështetjen e Prezencës së OSBE-së në Shqipëri.

Në takimin me Sekretarin e Përgjithshëm të Parlamentit të Portugalisë, Albino de Azevedo Soares, u diskutua mbi bashkëpunimin e deritanishëm dhe mundësitë e zgjerimit dhe intensifikimit të tij.

Sekretarët Gjonçaj dhe Soares identifikuan si fusha të mundshme bashkëpunimi diplomacinë parlamentare, autonominë financiare dhe administrative, mbështetjen e integrimit evropian të Shqipërisë, me fokus përafrimin e legjislacionit, menaxhimin e proceseve dhe modernizimin e shërbimeve parlamentare.

Bashkëpunimi mes dy parlamenteve vijon dhe po zgjerohet edhe me bashkëpunimin mes shërbimeve parlamentare. /ATSH