Bizneset që duan të përfitojnë nga lehtësitë e financimit përmes skemës së garancisë shtetërore mund të aplikojnë online nëpërmjet platformës “e-Albania”.

Ministrja e Ekonomisë dhe Inovacionit, Delina Ibrahimaj njoftoi se procesi kryhet tërësisht elektronikisht, përmes identifikimit të subjektit si biznes në “e-Albania”, përzgjedhjes së shërbimit përkatës, plotësimit të formularit dhe dërgimit të shprehjes së interesit.

Shprehja e interesit shqyrtohet nga Ministria e Ekonomisë dhe Inovacionit dhe, në vijim, subjekti referohet pranë bankës për verifikimin dhe ndjekjen e procedurave të financimit.

Sipas informacionit të publikuar nga ministrja Ibrahimaj, për çdo NIPT lejohet vetëm një aplikim aktiv.

Shërbimi do të jetë i vlefshëm deri më 20 nëntor 2027, ndërsa aplikimi kryhet online përmes platformës “e-Albania”.

Burimi ATSH