Qendra Spitalore Universitare “Nënë Tereza” i është bashkuar nismës botërore “Ndriçimi Gold”, në kuadër të Muajit të Ndërgjegjësimit për Kancerin Pediatrik.

Ministrja e Shëndetësisë dhe Mirëqenies Sociale, Klodiana Spahiu ndau pamje nga QSUT, ku dritat gold janë ndezur si simbol i shpresës, forcës dhe solidaritetit me fëmijët që përballen me sëmundjen dhe familjet e tyre.

“Sot, dritat gold ndriçojnë edhe në QSUT, si një simbol i shpresës, forcës dhe solidaritetit me çdo fëmijë që përballet me kancerin dhe me çdo familje që qëndron pranë tij”, u shpreh Spahiu.

Ajo theksoi se çdo fëmijë meriton kujdes, trajtim dhe shpresë.

“Çdo fëmijë meriton kujdesin, trajtimin dhe shpresën për të cilën luftojmë çdo ditë”, shkroi ministrja.

Nisma synon të rrisë ndërgjegjësimin për kancerin pediatrik dhe të përcjellë mesazhin e mbështetjes për fëmijët pacientë dhe familjet e tyre.

“Le të ndriçojmë gold. Le të ndriçojmë shpresën”, përfundoi Spahiu.

Burimi ATSH