Bashkëpunimi rajonal për mbrojtjen e natyrës dhe përballimin e sfidave mjedisore ishte në fokus të takimeve të ministrit të Mjedisit, Sofjan Jaupaj, në kuadër të Ministerialit të Tretë të Agjendës së Gjelbër për Ballkanin Perëndimor, zhvilluar në Zhabjak të Malit të Zi.

Jaupaj zhvilloi takime dypalëshe me ministren e Mjedisit të Kosovës, Fitore Pacolli, dhe ministrin e Mjedisit të Maqedonisë së Veriut, Muamet Hoxha, ku diskutuan angazhimet për krijimin e Parkut Ndërkufitar Korab–Koritnik–Mali i Sharrit, si dhe avancimin e projekteve të tjera rajonale në menaxhimin e mbetjeve.

Në takimin me ministrin e Mjedisit të Malit të Zi, Damjan Ćulafić, u diskutua për shkëmbimin e përvojës dhe ekspertizës teknike në kuadër të Kapitullit 27 të negociatave për anëtarësimin në Bashkimin Europian.

“Shumë shpejt, ekipet tona teknike do të takohen në një seminar dypalësh për të analizuar metodologjinë dhe të dhënat teknike për zhvillimin e rrjetit Natura 2000”, bëri të ditur Jaupaj.

Takimet u zhvilluan gjatë Ministerialit të organizuar nga Mali i Zi, në cilësinë e vendit që mban Presidencën e Procesit të Berlinit.

Marrë nga ATSH