Kujdesi dentar për fëmijët po zgjerohet edhe në zonat rurale, përmes Njësive Lëvizëse Dentare të Klinikës Stomatologjike Universitare.

Në kuadër të projektit “Shkolla për Shëndetin”, dy njësi lëvizëse dentare në Elbasan mundësojnë depistimin dhe ofrimin e shërbimeve dentare pranë fëmijëve.

Ministrja e Shëndetësisë dhe Mirëqenies Sociale, Klodiana Spahiu, gjatë një vizite në një prej njësive lëvizëse në Elbasan, u shpreh se po mendohet një tjetër projekt për fëmijët, të cilët pas depistimit të problemeve të shëndetit oral, kalojnë në një tjetër ndjekje të specializuar.

Spahiu bëri të ditur se si projekt pilot do të merret Elbasani, me synim përfshirjen e fëmijëve me çrregullime të spektrit të autizmit dhe fëmijëve me aftësi të kufizuara që ndjekin shkollat.

“Do ta marrim si pilot Elbasanin, në të gjitha shkollat, të fëmijëve me çrregullime të spektrit të autizmit dhe ata fëmijë që janë për paaftësi të lehtë mendore, aftësi të kufizuar, që janë nëpër shkolla. Dhe stomatologët do t’i depistojnë dhe pastaj nëpërmjet jush, të depistuarit do të shkruhen për çfarë kanë nevojë dhe do të realizohet mbushja”, tha Spahiu.

Nisma synon të rrisë aksesin në shërbimet dentare për fëmijët, veçanërisht për ata që ndodhen në zona ku nuk ka kabinete dentare në shkolla, si dhe të mundësojë identifikimin dhe trajtimin në kohë të problematikave dentare.

Në bashkëpunim me Njësitë Vendore të Kujdesit Shëndetësor, shërbimi do të shtrihet edhe për fëmijët me aftësi të kufizuara, duke krijuar një proces më të rregullt nga depistimi deri te trajtimi.

Burimi ATSH