Grupi parlamentar bilateral austriak për Shqipërinë & Maqedoninë e Veriut vizitoi Shqipërinë nga dt. 8-10 shtator. Me në krye deputetin Michael Hammer, grupi mundi të krijonte gjatë bisedave të shumta një ide gjithëpërfshirëse për zhvillimet aktuale dhe njëkohësisht të thellonte më tej marrëdhëniet dypalëshe, njofton Ambasada e Austrisë në Shqipëri.

Në qendër të bisedimeve ishin sidomos integrimi evropian, thellimi i mëtejshëm i bashkëpunimit ekonomik, si dhe sfidat e përbashkëta. Këto tema u shtjelluan ndër të tjera gjatë bisedave me kryetarin e parlamentit Niko Peleshi, ministrin e Jashtëm Ferit Hoxha, kryetaren e Grupit Parlamentar të Miqësisë Evis Kushi, si dhe me shumë komisione parlamentare.

Një tjetër pjesë e rëndësishme e vizitës ishte edhe biseda me përfaqësues dhe përfaqësuese të Shoqërisë Civile, si dhe me projekte të Agjencisë Austriake të Zhvillimit. Aty u shfaq dukshëm mbështetja austriake në terren.

Veçanërisht mbresëlënëse janë edhe referencat e shumëllojshme nga Austria në Kuvendin e Shqipërisë: duke filluar që me punishten e demokracisë, me qendrën e vizitorëve, deri te takimi me punonjëse, të cilave në kuadër të një burse austriake u jepet mundësia të njohin parlamentin austriak dhe më pas të sjellin përvojat e tyre në punën që bëjnë në Kuvend.

Kjo vizitë tregoi edhe njëherë se: Austrinë dhe Shqipërinë i lidh një partneritet i ngushtë dhe i shumëllojshëm. Austria mbetet një partner i besueshëm i Shqipërisë në rrugën e saj drejt Bashkimit Evropian.