Butrinti, një nga sitet më të rëndësishme historike dhe arkeologjike të Shqipërisë, me përmasat dhe vlerat e tij, ngre vazhdimisht pyetje që lidhen jo vetëm me të kaluarën, por edhe me mënyrën se si kjo pasuri duhet të ruhet dhe të menaxhohet në të ardhmen.

Nëpërmjet programit READ dhe Fondacionit të Menaxhimit të Butrintit, është hapur një thirrje për akademikët e diasporës shqiptare dhe studiuesit që jetojnë e punojnë në Shqipëri, për të zhvilluar projekte kërkimore bashkëpunuese të lidhura me Parkun Arkeologjik Kombëtar të Butrintit.

Qëllimi i kësaj nisme nuk është vetëm financimi i kërkimit shkencor. Organizatorët synojnë të shqyrtojnë mënyra se si njohuritë arkeologjike mund të ndihmojnë në ruajtjen më të mirë të Butrintit, si mund të përmirësohet përvoja e vizitorëve duke mbrojtur vlerat kulturore dhe natyrore të sitit, si dhe si rezultatet e kërkimit akademik mund të shërbejnë për institucionet në marrjen e vendimeve për të ardhmen e parkut.

Nisma synon të lidhë ekspertizën e akademikëve shqiptarë në diasporë me njohuritë lokale dhe kontekstin institucional të institucioneve që veprojnë në terren. Në këtë mënyrë, bashkëpunimi akademik synon të prodhojë rezultate me përdorim praktik për të ardhmen e Butrintit.

Në thirrje përfshihen kërkime në fusha si arkeologjia, konservimi, ekologjia, hidrologjia dhe gjeologjia, bujqësia, menaxhimi i trashëgimisë kulturore dhe menaxhimi i vizitorëve.

Akademikët dhe institucionet që plotësojnë kriteret e përcaktuara inkurajohen të shqyrtojnë udhëzimet e thirrjes dhe të aplikojnë, në mënyrë që kërkimi shkencor të mos mbetet vetëm në kuadër të botimeve akademike, por të shërbejë edhe si një mjet për ruajtjen, interpretimin dhe menaxhimin e qëndrueshëm të Butrintit.

Marrë nga ATSH