Agjencia Kombëtare e Mbrojtjes Civile ka vijuar gjatë vitit 2025 forcimin e sistemit të mbrojtjes civile në vend, përmes përmirësimit të kuadrit ligjor, rritjes së kapaciteteve vendore, investimeve në infrastrukturë dhe zgjerimit të bashkëpunimit ndërkombëtar.

Kështu u shpreh drejtori i përgjithshëm i Agjencia Kombëtare e Mbrojtjes Civile, Haki Çako, gjatë raportimit vjetor në Komisionin për Çështjet e Brendshme dhe të Mbrojtjes.

“Përgjatë vitit 2025, AKMC vijoi përmbushjen e misionit të saj në harmoni të plotë me Direktivën e Mbrojtjes 2025, me fokus zhvillimin, përmirësimin dhe fuqizimin e sistemit të Mbrojtjes Civile në Shqipëri”, tha Çako, duke theksuar se prioritet mbeti menaxhimi i riskut nga fatkeqësitë, zhvillimi i kuadrit rregullator vendor dhe dixhitalizimi i sistemit të emergjencave civile.

Sipas tij, gjatë vitit 2025 janë regjistruar 2 743 raste zjarri në të gjithë vendin, me rreth 62 mijë hektarë sipërfaqe të prekur.

“Në operacionet e shuarjes së zjarreve janë angazhuar mbi 30 mijë forca operacionale dhe më shumë se 2200 mjete, ndërsa dy helikopterë të Forcës Ajrore kryen mbi 120 misione”, deklaroi Çako.

Kreu i AKMC-së nënvizoi gjithashtu se Shqipëria ka vijuar të luajë një rol aktiv në Mekanizmin Evropian të Mbrojtjes Civile.

“Janë nënshkruar marrëveshje bashkëpunimi me Italinë, Greqinë, Suedinë dhe Finlandën, ndërsa përmes mekanizmit evropian u sigurua mbështetje ndërkombëtare për përballimin e zjarreve dhe emergjencave të tjera”, tha ai.

Në fushën e investimeve, Çako bëri të ditur se gjatë vitit 2025 u financuan 11 projekte infrastrukturore, 42 projekte për mjete dhe pajisje, si dhe pesë projekte për rehabilitimin e digave, me fonde që synojnë rritjen e sigurisë dhe parandalimin e dëmeve nga fatkeqësitë natyrore.

“AKMC do të vijojë punën për forcimin e kapaciteteve vendore, modernizimin e sistemeve të reagimit dhe përafrimin e legjislacionit me standardet e Bashkimit Evropian, në funksion të mbrojtjes së jetës, pronës dhe mjedisit”, përfundoi Çako.

/Marrë nga ATSH