Ministri i Turizmit, Kulturës dhe Sportit, Blendi Gonxhja, e cilësoi kulturën si një nga historitë më të bukura të suksesit në vend, duke iu referuar shifrave gjithnjë në rritje, të vizitorëve në sitet e trashëgimisë kulturore.

Ministri Gonxhja tha se gjatë muajve janar–maj 2026, institucionet dhe qendrat e trashëgimisë kulturore kanë mirëpritur 424,082 vizitorë vendas dhe të huaj. Prej tyre, 143,086 vizitorë u regjistruan në muzetë kombëtarë, 188,437 persona vizituan parqet arkeologjike dhe 91,559 vizitorë u regjistruan në kala dhe monumente të kulturës.

Krahasuar me të njëjtën periudhë të vitit 2023, vizitueshmëria është rritur me 95.7%, ndërsa të ardhurat e gjeneruara kanë shënuar një rritje spektakolare prej 147.44%.

Krahasuar me vitin e shkuar vizitueshmëria u rrit me 9.9% dhe të ardhurat u rritën me +7.3%.

“Trashëgimia jonë nuk është thjesht histori, ajo është energji, krenari kombëtare dhe një magnet që tërheq gjithnjë e më shumë vizitorë nga vendi dhe e gjithë bota”, tha kreu i MTKS, Blendi Gonxhja.

Burimi ATSH