Zëvendëskryeministri i parë në detyrë dhe ministër i Punëve të Jashtme dhe Diasporës i Kosovës, Glauk Konjufca ka vlerësuar koordinimin ndërmjet Kosovës dhe Shqipërisë si një proces të natyrshëm dhe ndër më të lehtët në marrëdhëniet ndërkombëtare.

Në një konferencë të përbashkët për media sot me ministrin për Evropën dhe Punët e Jashtme, Ferit Hoxha, pas takimit të zhvilluar në Prishtinë, Konjufca tha se bashkëpunimi mes dy vendeve përbën një arritje të rëndësishme.

“Të koordinosh politikën e jashtme në mes Kosovës dhe Shqipërisë është gjëja më e lehtë. Kjo është një arritje shumë e madhe”, deklaroi ai.

Konjufca theksoi gjithashtu mbështetjen e vazhdueshme të Shqipërisë për proceset ndërkombëtare të Kosovës, duke bërë të ditur se në takim është diskutuar edhe për nevojën e një afrimi më të shpejtë të Kosovës me NATO-n.

“Kordinimi i shteteve tona është jetik, edhe nga ana jonë, edhe nga ana e Shqipërisë”, u shpreh ai.

Duke folur për mbledhjen e përbashkët të dy qeverive, Konjufca sqaroi se ajo është shtyrë për shkak të zhvillimeve zgjedhore dhe procesit të formimit të institucioneve të reja në Kosovë.

Ai theksoi se ideja e mbledhjes së përbashkët nuk është hequr nga agjenda, por do të realizohet sapo të krijohen kushtet institucionale.

“Kjo ide nuk duhet të humbet, por do të shtyhet deri në formimin e institucioneve të reja, kur edhe do të krijohen kushtet për mbajtjen e mbledhjes së dy qeverive”, u shpreh Konjufca.

Burimi ATSH