Qendra Shëndetësore Vorë vijon të konsolidojë shërbimet e kujdesit parësor përmes përmirësimit të infrastrukturës, pajisjeve bashkëkohore mjekësore dhe zgjerimit të gamës së shërbimeve në funksion të nevojave të komunitetit.

Ministrja e Shëndetësisë dhe Mirqenies Sociale, Evis Sala zhvilloi një vizitë në këtë qendër, ku u takua nga afër me ekipin e drejtuesve dhe personelin shëndetësor, por edhe pacientët në qendër.

Një nga investimet e rëndësishme është pajisja e qendrës me teknologji moderne diagnostikuese, përfshirë grafinë digjitale, e cila mundëson ekzaminime më të shpejta, rezultate me cilësi të lartë dhe rritje të efikasitetit në diagnostikimin e pacientëve.

Gjithashtu, funksionimi i laboratorit mikrokimik ka sjellë rritje të cilësisë dhe shpejtësisë së analizave laboratorike, duke u ofruar qytetarëve akses më të lehtë në shërbime diagnostikuese pranë vendbanimit të tyre.

Sipas MShMS-së, një rëndësi e veçantë i kushtohet edhe shërbimit shëndetësor në banesë, i cili garanton kujdes mjekësor për pacientët që, për shkak të gjendjes shëndetësore, moshës apo pamundësisë fizike, nuk mund të paraqiten pranë qendrës. Personeli shëndetësor realizon vizita në banesë, monitorim të gjendjes klinike, shërbime infermierore sipas nevojave të pacientëve.

Investimet e MShMS në pajisje modern dhe forcimin e kapaciteteve profesionale, bëjnë që Qendra Shëndetësore Vorë të garantojë shërbime shëndetësore cilësore, efikase dhe të aksesueshme për çdo qytetar.

Burimi ATSH