Në kuadër të vizitës së tij zyrtare në Tiranë, ministri i Mbrojtjes i Greqisë, Nikos Dendias u prit nga kryeministri i Shqipërisë, Edi Rama, me të cilin zhvilloi një takim ku u analizua situata më e gjerë gjeopolitike në rajon.

Gjatë bisedës, ai pati mundësinë të flasë edhe për Himarën, qytetin nga i cili beson se ka origjinën, duke ritheksuar se minoriteti etnik grek përbën një urë miqësie mes dy shteteve dhe dy popujve.

Ministri grek vlerësoi gjithashtu mikpritjen e kryeministrit Edi Rama, i cili e shoqëroi në një vizitë në kopshtin e rezidencës kryeministrore në Shqipëri, ku edhe shtroi një drekë në nder të vizitës së tij.

“U prita nga kryeministri i Shqipërisë, Edi Rama, në kuadër të vizitës sime në Tiranë. Analizuam situatën gjeopolitike në rajonin tonë më të gjerë. Pata mundësinë të flas për Himarën, qytetin nga i cili besoj se vij me origjinë, dhe përsërita qëndrimin tim se pakica etnike greke është një urë miqësie midis dy shteteve dhe dy popujve. Pata kënaqësinë e veçantë të bëja një tur në kopshtin e rezidencës kryeministrore të Shqipërisë, së bashku me kryeministrin, Edi Rama, ku më priti për një vakt“, tha Dondias në platformën X.

Më herët, ai zhvilloi një pritje zyrtare dhe një takim me homologun shqiptar, Ermal Nufi, në Ministrinë e Mbrojtjes në Tiranë.

Në fokus të takimit ishin forcimi i marrëdhënieve dypalëshe, bashkëpunimi në kuadër të NATO-s, si edhe zhvillimet rajonale dhe ndërkombëtare.

Bashkëpunimi në fushën e mbrojtjes mes Greqisë dhe Shqipërisë, i bazuar në angazhimin ndaj parimeve të së Drejtës Ndërkombëtare dhe respektimit të të drejtave të minoritetit etnik grek, u vlerësua si një shtyllë e paqes, sigurisë dhe progresit për të gjithë rajonin.

Gjatë takimit me homologun shqiptar, Ermal Nufi, palët ranë dakord për mbledhjen e menjëhershme të Komisionit të Përbashkët të Ekspertëve për Varrezat Ushtarake.

“Pritje zyrtare dhe takim me homologun tim shqiptar, Ermal Nufi në Ministrinë e Mbrojtjes së Shqipërisë në Tiranë. Në fokus të takimit ishin përmirësimi i marrëdhënieve dypalëshe, bashkëpunimi në kuadër të NATO-s, si dhe zhvillimet rajonale dhe ndërkombëtare. Bashkëpunimi në mbrojtje midis Greqisë dhe Shqipërisë, bazuar në angazhimin ndaj parimeve të së Drejtës Ndërkombëtare dhe respektimin e të drejtave të pakicës etnike greke, është një shtyllë paqeje, sigurie dhe progresi për të gjithë rajonin”, tha ministri grek në X.

Gjatë takimit me homologun tim shqiptar Ermal Nufi, ramë dakord që të mblidhet menjëherë Komiteti i Përbashkët i Ekspertëve për Varrezat Ushtarake. Greqia do t’i respektojë gjithmonë ata që sakrifikuan veten për vendin tonë.

“Greqia do të tregojë gjithmonë respekt për ata që sakrifikuan jetën për vendin tonë”, u shpreh ministri grek, Dendias