Forcimi i koordinimit ndërinstitucional dhe rritja e gatishmërisë për parandalimin e zjarreve ishin në fokus të mbledhjes së zhvilluar sot nga prefekti i qarkut Tiranë, Shkëlqim Hajdari, me Komisionin e Mbrojtjes Civile në nivel vendor.

Gjatë takimit, u diskutuan masat konkrete për përballimin e sezonit veror, me theks te bashkërendimi i punës mes institucioneve vendore dhe qendrore, si dhe rritja e efikasitetit në menaxhimin e emergjencave.

Hajdari nënvizoi rëndësinë e marrjes së masave të menjëhershme dhe gjithëpërfshirëse për parandalimin e zjarreve gjatë periudhës së temperaturave të larta, duke kërkuar një angazhim më të madh të të gjitha strukturave në nivel qarku dhe bashkie.

Në takim u kërkua angazhim maksimal i burimeve njerëzore dhe logjistike për të garantuar reagim të shpejtë dhe efikas në rast emergjencash, me synim minimizimin e dëmeve materiale dhe mbrojtjen e jetës së qytetarëve.

Ndër detyrat prioritare të përcaktuara janë vijimi i sistemimit të banorëve të prekur nga zjarri i 14 prillit 2026 në Kompleksin “Arlis” dhe përshpejtimi i plotësimit të strukturave të MZSH-ve me mjete dhe uniforma, ngritja e grupeve vullnetare pranë çdo bashkie për ndërhyrje fillestare në shuarjen e zjarreve, si dhe rritja e rolit të njësive administrative në terren, si dhe përditësimi i planeve të reagimit dhe sistemeve të njoftimit në kohë reale.

Burimi ATSH