Deputetët e komisionit për Burimet Natyrore, Infrastrukturën dhe Zhvillimin e Qëndrueshëm zhvilluan më datën 4 mars një takim pune në ambientet e Entit Rregullator të Ujit (ERRU), ku u prezantua modeli i Planit të Biznesit për shoqëritë ujësjellës-kanalizime dhe u diskutuan sfidat kryesore të sektorit në kuadër të reformës së ndërmarrë.

Komisionin e kryesuar nga kryetarja Anila Denaj e pritën në seli kryetarja e Komisionit Kombëtar Rregullator, Gerta Lubonja, si dhe përfaqësues të stafit të ERRU-së, Bankës Botërore dhe Agjencisë Kombëtare të Ujësjellës-Kanalizimeve (AKUK).

Prezantimet përfshinë objektivat, strukturën dhe komponentët e Planit të Biznesit, si dhe hapat e ndërmarrë për hartimin dhe zbatimin e tij.

Në fjalën e saj, Denaj theksoi rëndësinë e bashkëpunimit të qëndrueshëm mes Kuvendit dhe institucioneve të pavarura, duke e cilësuar këtë marrëdhënie si partneritet në funksion të interesit publik dhe për mbikëqyrje më efikase të sektorit.

Ajo nënvizoi se takime të ngjashme do të zhvillohen gjatë muajit prill edhe me Autoritetin e Komunikimeve Elektronike dhe Postare (AKEP) dhe Entin Rregullator të Energjisë (ERE).

Deputetët pjesëmarrës diskutuan mbi ecurinë e reformës në sektor, mbrojtjen e konsumatorit, rritjen e efikasitetit energjetik të shoqërive UK dhe përmirësimin e performancës financiare, duke marrë sqarime të detajuara nga Lubonja dhe stafi i ERRU-së.

Pas takimit, anëtarët e Komisionit zhvilluan një vizitë në ambientet e punës së Entit Rregullator të Ujit, për të njohur nga afër veprimtarinë e tij.

Burimi ATSH