Një delegacion i gjyqtarëve të Gjykatës së Lartë kryesuar nga kryetari Sokol Sadushi, zhvilloi një vizitë pune në Gjykatën Evropiane për të Drejtat e Njeriut në Strasburg.

Fokus i vizitës ishte tryeza e përbashkët e diskutimit me gjyqtarët e GJEDNJ, mbi rolin e gjykatave të larta kombëtare në zbatimin e standardeve të Konventës Evropiane për të Drejtat e Njeriut.

Në fjalën e tij përshëndetëse Sadushi u shpreh se “dialogu që zhvillojmë sot nuk është midis gjyqtarëve shqiptarë dhe gjyqtarëve evropianë. Është një bisedë midis gjyqtarëve evropianë: disa ulen në Strasburg, të tjerë në Tiranë, por të gjithë kanë të përbashkët të njëjtin mision, mbrojtjen e të drejtave të njeriut”.

Në këtë frymë, presidenti i GJEDNJ, Mattias Guyomar, theksoi se “shkëmbimet si ai që zhvilluam sot na afrojnë më shumë dhe na lejojnë të forcojmë bashkëpunimin dhe mirëkuptimin ndërgjyqësor. Dua t’ju falënderoj nga zemra që erdhët në Gjykatë dhe na dhatë mundësinë të zhvillojmë një dialog të hapur, të ndërtuar mbi besim dhe respekt reciprok, që fuqizon institucionet tona dhe garanton zbatimin e standardeve të larta të të drejtave të njeriut”.

Në kuadër të sesioneve tematike, gjyqtari i Kolegjit Administrativ Gentian Medja prezantoi temën “Subsidiariteti dhe rishikimi procedurial: roli i gjykatave kombëtare të shkallës së lartë në parandalimin e shkeljeve të Konventës”.

Kryetari i Kolegjit Penal Ilir Panda trajtoi temën “Paraburgimi dhe masat mbi bazën e pasurisë në procedimet penale: kohëzgjatja, rishikimi dhe ndikimi kumulativ.”

Gjatë programit të vizitës, delegacioni ndoqi gjithashtu një seancë në Dhomën e Madhe për çështjen Tergek v. Türkiye si edhe zhvilloi takime pune me gjyqtarë dhe juristë të Gjykatës.

Burimi ATSH