Ministri i Turizmit, Kulturës dhe Sportit, Blendi Gonxhja ishte personalisht ne Koshtan të Memaliajt për të parë nga afër punimet për restaurimin dhe konservimin e Teqesë së Koshtanit.

“Ka qenë një lutje e kahershme e Dervish Hetemit, për ndihmë dhe jemi më në fund në një moment ku po punohet seriozisht jo vetëm për ta shpëtuar objektin e kategorisë së parë por edhe për t’i dhënë vlerë nga pikëpamja e gjithë infrastrukturës përreth dhe e interierit, në mënyrë që të ketë një vlerë muzeale në vijim por edhe që të ketë funksionalitet sa më të plotë”, tha ministri Gonxhja.

Ndërhyrjen në Teqenë e Koshtanit, kreu i MTKS-së e cilësoi si një investim që dëshmon angazhimin e qeverisë për mbrojtjen e trashëgimisë kulturore. Ministri ka ndjekur nga afër punimet në këtë Monument Kulture të Kategorisë I, me vlera të çmuara shpirtërore e historike.

Përmes kësaj ndërhyrjeje, ndalet degradimi, mbrohet origjinaliteti dhe përmirësohen mjediset e brendshme dhe infrastruktura përreth.

Ministri Gonxhja bëri të ditur se, do të punohet gjithashtu për të përmbushur angazhimin për përmirësimin e rrugës që të çon deri tek teqeja, për të lehtësuar ardhjen e banorëve, besimtarëve dhe turistëve.

“Ruajtja e kësaj pasurie dhe përcjellja e saj brezave të ardhshëm është një përgjegjësi që e përmbushim me punë konkrete”, u shpreh Gonxhja.

Burimi ATSH